LUKA - SURA YA 18

¹ Akawaambia mfano, ya kwamba imewapasa kumwomba Mungu sikuzote, wala wasikate tamaa. 
² Akasema, Palikuwa na kadhi katika mji fulani, hamchi Mungu, wala hajali watu. 
³ Na katika mji huo palikuwa na mwanamke mjane, aliyekuwa akimwendea-endea, akisema, Nipatie haki na adui wangu. 
⁴ Naye kwa muda alikataa; halafu akasema moyoni mwake, Ijapokuwa simchi Mungu wala sijali watu, 
⁵ lakini, kwa kuwa mjane huyu ananiudhi, nitampatia haki yake, asije akanichosha kwa kunijia daima. 
⁶ Bwana akasema, Sikilizeni asemavyo yule kadhi dhalimu. 
⁷ Na Mungu, je! Hatawapatia haki wateule wake wanaomlilia mchana na usiku, naye ni mvumilivu kwao? 
⁸ Nawaambia, atawapatia haki upesi; walakini, atakapokuja Mwana wa Adamu, je! Ataiona imani duniani? 
⁹ Akawaambia mfano huu watu waliojikinai ya kuwa wao ni wenye haki, wakiwadharau wengine wote. 
¹⁰ Watu wawili walipanda kwenda hekaluni kusali, mmoja Farisayo, wa pili mtoza ushuru. 
¹¹ Yule Farisayo akasimama akiomba hivi moyoni mwake; Ee Mungu, nakushukuru kwa kuwa mimi si kama watu wengine, wanyang'anyi, wadhalimu, wazinzi, wala kama huyu mtoza ushuru. 
¹² Mimi nafunga mara mbili kwa juma; hutoa zaka katika mapato yangu yote. 
¹³ Lakini yule mtoza ushuru alisimama mbali, wala hakuthubutu hata kuinua macho yake mbinguni, bali alijipiga-piga kifua akisema, Ee Mungu, uniwie radhi mimi mwenye dhambi. 
¹⁴ Nawaambia, huyu alishuka kwenda nyumbani kwake amehesabiwa haki kuliko yule; kwa maana kila ajikwezaye atadhiliwa, naye ajidhiliye atakwezwa. 
¹⁵ Wakamletea na watoto wachanga ili awaguse; lakini wanafunzi walipoona waliwakemea. 
¹⁶ Bali Yesu akawaita waje kwake, akasema, Waacheni watoto wadogo waje kwangu, wala msiwazuie, kwa kuwa watu kama hao ufalme wa Mungu ni wao. 
¹⁷ Amin, nawaambia, Mtu ye yote asiyeupokea ufalme wa Mungu kama mtoto mdogo hauingii kamwe. 
¹⁸ Tena, mtu mkubwa mmoja alimwuliza, akisema, Mwalimu mwema, nifanye nini ili nipate kuurithi uzima wa milele? 
¹⁹ Yesu akamwambia, Mbona unaniita mwema? Hakuna aliye mwema ila mmoja, naye ndiye Mungu. 
²⁰ Wazijua amri; Usizini, Usiue, Usiibe, Usishuhudie uongo, Waheshimu baba yako na mama yako. 
²¹ Akasema, Hayo yote nimeyashika tangu utoto wangu. 
²² Yesu aliposikia hayo alimwambia, Umepungukiwa na neno moja bado; viuze ulivyo navyo vyote, ukawagawanyie maskini, nawe utakuwa na hazina mbinguni; kisha, njoo unifuate. 
²³ Lakini aliposikia hayo alihuzunika sana, maana alikuwa na mali nyingi. 
²⁴ Yesu alipoona vile alisema, Kwa shida gani wenye mali watauingia ufalme wa Mungu! 
²⁵ Kwa maana ni vyepesi ngamia kupita katika tundu la sindano kuliko tajiri kuingia katika ufalme wa Mungu. 
²⁶ Nao waliosikia walisema, Ni nani basi awezaye kuokoka? 
²⁷ Akasema, Yasiyowezekana kwa wanadamu yawezekana kwa Mungu. 
²⁸ Petro akasema, Tazama, sisi tumeviacha vitu vyetu vyote na kukufuata. 
²⁹ Akawaambia, Hakika nawaambia, hakuna mtu aliyeacha nyumba, au mke, au ndugu, au wazazi, au wana, kwa ajili ya ufalme wa Mungu, 
³⁰ asiyepokea zaidi mara nyingi katika zamani hizi, na katika ulimwengu ujao uzima wa milele. 
³¹ Akawachukua wale Thenashara, akawaambia, Tazameni, tunapanda kwenda Yerusalemu, na mambo yote yatatimizwa, Mwana wa Adamu aliyoandikiwa na manabii. 
³² Kwa kuwa atatiwa mikononi mwa Mataifa, atafanyiwa dhihaka; atatendwa jeuri, na kutemewa mate; 
³³ nao watampiga mijeledi, kisha watamwua; na siku ya tatu atafufuka. 
³⁴ Walakini hawakuelewa maneno hayo hata kidogo, na jambo hilo lilikuwa limefichwa kwao, wala hawakufahamu yaliyonenwa. 
³⁵ Ikawa alipokaribia Yeriko, mtu mmoja kipofu alikuwa ameketi kando ya njia, akiomba sadaka; 
³⁶ na alipowasikia makutano wakipita, aliuliza, Kuna nini? 
³⁷ Wakamwambia, Yesu wa Nazareti anapita. 
³⁸ Akapiga kelele, akisema, Yesu, Mwana wa Daudi, unirehemu. 
³⁹ Basi wale waliotangulia wakamkemea ili anyamaze; lakini yeye alizidi sana kupaza sauti, Ee Mwana wa Daudi, unirehemu. 
⁴⁰ Yesu akasimama, akaamuru aletwe kwake; na alipomkaribia, alimwuliza, 
⁴¹ Wataka nikufanyie nini? Akasema, Bwana, nipate kuona. 
⁴² Yesu akamwambia, Upewe kuona; imani yako imekuponya. 
⁴³ Mara hiyo akapata kuona, akamfuata, huku akimtukuza Mungu. Na watu wote walipoona hayo walimsifu Mungu.